Արժույթի միջազգային հիմնադրամի (ԱՄՀ, IMF) տվյալներով՝ մեկ շնչին ընկնող համախառն ներքին արդյունքով (ՀՆԱ) Հայաստանը 2020 թվականին առաջ է անցնելու Վրաստանից ու Ադրբեջանից։ Հիմնադրամի պաշտոնական կայքէջում հրապարակված թվերի համաձայն՝ 2020-ին Հայաստանում մեկ շնչին բաժին կընկնի 4 հազար 760 դոլար, այն պարագայում, երբ հարևան Ադրբեջանում այն կկազմի 4 հազար 720, իսկ Վրաստանում՝ է՛լ ավելի քիչ՝ 4 հազար 630 դոլար։
Ֆեյսբուքյան գրառմամբ թեմային անդրադարձել է նաև վարչապետ Նիկոլ Փաշինյանը՝ նշելով. – «Հիշո՞ւմ եք, որ ԱԺ ամբիոնից հայտարարեցի, որ 2019 թվականի արդյունքներով՝ մեկ շնչին ընկնող ՀՆԱ-ի ցուցանիշով կանցնենք Վրաստանին, իսկ 2020 թվականի արդյունքներով՝ նաև Ադրբեջանին: Արժույթի միջազգային հիմնադրամը պաշտոնապես հաստատել է այս գնահատականը. 2019 թվականի արդյունքներով անցել ենք Վրաստանին, 2020 թվականին կանցնենք Ադրբեջանին՝ դառնալով Հարավային Կովկասի առաջատար երկիրը»։
Եթե հիմք ընդունենք ԱՄՀ-ի այս վերջին թվերը, տեսնում ենք, որ տնտեսական հաջողությունների առումով Հայաստանը միջին հորիզոնական է զբաղեցրել. կանխատեսման համաձայն՝ 2020-ի արդյունքներով 15 հանրապետությունների շարքում Հայաստանը կզբաղեցնի 8-րդ տեղը, չնայած 1988 թվականի երկրաշարժին, ղարաբաղյան պատերազմին, շարունակվող շրջափակմանը և տասնամյակներ տևած կոռումպացված համակարգին։
Ըստ ԱՄՀ-ի, հետխորհրդային երկրներից 2020 թվականին առաջին տեղում Էստոնիան է լինելու՝ 24 հազար 800 դոլար ցուցանիշով, վերջին հորիզոնականում՝ Տաջիկստանը՝ 910 դոլարով.
Էստոնիա – 24 հազար 800 դոլար
Լիտվա – 20 հազար 350 դոլար
Լատվիա – 19 հազար 100 դոլար
Ռուսաստան – 11 հազար 310 դոլար
Ղազախստան – 9 հազար 670 դոլար
Թուրքմենստան – 8 հազար 990 դոլար
Բելառուս – 6 հազար 740 դոլար
Հայաստան – 4 հազար 760 դոլար
Ադրբեջան – 4 հազար 720 դոլար
Վրաստան – 4 հազար 630 դոլար
Ուկրաինա – 3 հազար 880 դոլար
Մոլդովա – 3 հազար 470 դոլար
Ուզբեկստան – 2 հազար 90 դոլար
Ղրղըզստան – 1 340
Տաջիկստան-910 դոլար
Նշենք նաև՝ եթե Հայաստանն առաջ է անցելնելու Ադրբեջանից ու Վրաստանից, ապա տակավին զիջելու է Թուրքիային, ուր մեկ շնչին ընկնող ՀՆԱ-ն 2020-ին կկազմի 9 հազար 680 դոլար, և Իրանին, որտեղ այդ թիվը 5 հազար 500 դոլար է լինելու։
