ՀՀ Արդարադատության նախարարության կողմից հանրային քննարկման է ներկայացվել «Նոտարիատի մասին» օրենքում փոփոխություններ կատարելու մասին» նախագիծը, որն ուղղված է անշարժ գույքի նկատմամբ իրավունքների պետական գրանցման գործընթացի պարզեցմանը։
Նախատեսվում է՝
• Նոտարները պարտադիր կարգով ՀՀ Կադաստրի Կոմիտե կներկայացնեն գործարքից ծագող իրավունքների պետական գրանցման դիմումը՝ անկախ կողմերի ցանկությունից։ Գործարքից ծագաց իրավունքների գրանցումը իրականացվելու է առանց քաղաքացու լրացուցիչ դիմումի։
• Ժառանգության իրավունքի վկայագրերի դեպքում կարգավորումը կմնա անփոփոխ․ նոտարը Կադաստրի կոմիտե կդիմի միայն քաղաքացու պահանջով։
• Նոտարները հավելյալ 3000 դրամ վճար չեն գանձի գրանցման դիմում ներկայացնելու համար։
Ի՞նչ արդյունք է ակնկալվում․
– Կկրճատվի գործարքների գրանցման ժամանակահատվածը,
-Կբարձրանա անշարժ գույքի գործարքների իրավական պաշտպանվածությունը,
-Կնվազի փաստաթղթաշրջանառությունը, քանի որ գործընթացը կիրականացվի նոտարի միջոցով մեկ պատուհանի սկզբունքով։
Օրենսդրական այս փոփոխությունը կարևոր քայլ է անշարժ գույքի գործարքների ապահովության և գործընթացի դյուրացման ուղղությամբ։
Վերը նշված փոփոխությունները ուժի մեջ կմտնեն միայն Ազգային ժողովի կողմից օրենքի ընդունումից և Հանրապետության նախագահի կողմից դրա ստորագրումից հետո։
