ՀՀ ԱԺ պաշտոնական կայքից տեղեկանում ենք, որ սեպտեմբերի 13-ին «Դաբլթրի բայ Հիլթն» հյուրանոցում տեղի է ունեցել Հայաստան-Իսրայել հասարակական միջազգային երրորդ համաժողովը, որին մասնակցել են ՀՀ ԱԺ Հայաստան-Իսրայել բարեկամական խմբի ղեկավար, ՀՀ ԱԺ ֆինանսավարկային եւ բյուջետային հարցերի մշտական հանձնաժողովի նախագահ Գագիկ Մինասյանը, բարեկամական խմբի անդամները եւ Իսրայելից ժամանած մի շարք ներկայացուցիչներ` Իսրայելի Կնեսետի փոխխոսնակ, Իսրայել-Հայաստան բարեկամական խմբի ղեկավար Թալի Պլոսկովի գլխավորությամբ: Համաժողովի աշխատանքներին մասնակցել են նաեւ ոլորտի պատասխանատուներ հայկական եւ հրեական կողմից, ինչպես նաեւ մի շարք հյուրեր:
Համաժողովի բացմանը ելույթներով հանդես են եկել Հայաստանի եւ Իսրայելի միջեւ խորհրդարանական բարեկամական խմբերի ղեկավարներ Գագիկ Մինասյանը եւ Թալի Պլոսկովը: Համաժողովի աշխատանքները համակարգել են Հայկ Քոթանջյանը եւ Ալեքսանդր Ցինկերը:
Համաժողովին նախորդող օրերին երկու երկրների համապատասխան ոլորտների ներկայացուցիչներն ունեցել են մի շարք հանդիպումներ եւ քննարկումներ: Առանձնացվել են ոլորտային որոշ ծրագրեր, որոնց շուրջ առաջիկայում համատեղ աշխատանքներ կիրականացվեն:
Նախանշվել են հաջորդ համաժողովի ոլորտային թեմաները. համաժողովը նախատեսվում է անցկացնել Իսրայելում, իսկ մինչ այդ աշխատանքներ կիրականացվեն այցի ընթացքում ձեռք բերված պայմանավորվածությունների իրականացման ուղղությամբ:
Նշենք, որ սեպտեմբերի 14-ին ավարտվել է Իսրայելի Կնեսետի փոխխոսնակ, Իսրայել-Հայաստան պատգամավորական բարեկամական խմբի ղեկավար Թալի Պլոսկովի գլխավորած պատվիրակության այցը Հայաստան:
