Մշտական բնակության միակ վայր հանդիսացող բնակարանը ԴԱՀԿ-ի կողմից բռնագանձման ենթակա չէ

Մեր զրուցակիցն է ELL գործընկերության իրավաբան Ռուզաննա Հարությունյանը։

-«Դատական ակտերի հարկադիր կատարման մասին» Հայաստանի Հանրապետության օրենքում փոփոխություն է կատարվել հօգուտ քաղաքացու։ Կմանրամասնեք՝ ի՞նչ է ենթադրում նոր օրենքը։

-Հայաստանի Հանրապետությունը՝ որպես սոցիալական պետություն, 2016 թվականի դեկտեմբերի 16-ին «Դատական ակտերի հարկադիր կատարման մասին» Հայաստանի Հանրապետության օրենքում լրացումներ կատարելու

մասին» Հայաստանի Հանրապետության ՀՕ-226-Ն օրենքի ընդունմամբ սահմանեց, որ քաղաքացի-պարտապանի բնակարանը կամ դրա բաժինը, որը պարտապանի համար հանդիսանում է մշտական բնակության միակ վայր, և որի մեկնարկային գինը հավասար կամ ցածր է Հայաստանի Հանրապետության կառավարության կողմից սահմանված` նվազագույն գումարից, բռնագանձման ենթակա չէ:

Առաջնորդվելով Օրենքի հիշյալ փոփոխությամբ և անհրաժեշտությամբ սահմանել բռնագանձման ոչ ենթակա մշտական բնակության միակ վայրի նվազագույն գումարը՝ 2017 թվականի հուլիսի 13-ի կառավարության նիստին ընդունվեց Պարտապանի միակ բնակարանի իրացման համար նվազագույն գումար սահմանելու մասին կառավարության որոշումը:

 -Ի՞նչ դրական արդյունքի կհանգեցնի Օրենքի փոփոխությունը։

 -Այս փոփոխության արդյունքում կերաշխավորվի սոցիալական տեսանկյունից կարևորվող քաղաքացիների միակ բնակարանը պահպանելու հնարավորությունը և նրանց զերծ կպահի անօթևանության մեջ հայտնվելու սպառնալիքից:

-Որքա՞ն է սահմանվել բնակարանի նվազագույն գումարը։

-Կառավարության որոշմամբ քաղաքացի-պարտապանի բռնագանձման ոչ ենթակա միակ բնակարանի իրացման համար նվազագույն գումարը է սահմանվել 4 .900.000  ՀՀ դրամը:

Այսպես, նման իրավակարգավորումների հիմքով բռնագանձում չի կարող տարածվել պարտապան-քաղաքացու պարտավորությունները մարելու համար այն բնակարանի (այդ թվում՝ բնակարանի հետ մեկ միասնական գույքային միավոր կազմող տնամերձ հողամասի և այդ հողամասի վրա առկա օժանդակ կառույցների) կամ դրա բաժնի վրա՝

• Որը քաղաքացու համար հանդիսանում է մշտական բնակության միակ վայր, և
• Որի գինը հավասար կամ ցածր է 4.900.000 ՀՀ դրամից (իսկ բաժնեմասի դեպքում՝ նվազագույն գումարը հավասար կամ ցածր է 4.900.000 ՀՀ դրամի և բնակարանի բաժնեմասի արտադրյալի արժեքից):

-Կա՞ն բացառություններ։ Ո՞ր դեպքերի վրա  չի տարածվում այս իրավակարգավորումը։

 -Այո՛, կան։ Հարկ է հաշվի առնել, որ նման կարգավորումները չեն տարածվում այն դեպքերի վրա, երբ

• Մշտական բնակության միակ վայր հանդիսացող գույքը գրավադրված է եղել այն պարտավորության ապահովման համար, որը մարելու համար բռնագանձում է տարածվելու,
• Մշտական բնակության վայր հանդիսացող միակ բնակարանի բռանագնձմամբ բավարարվելու է ալիմենտային, կյանքին կամ առողջությանը կամ հանցագործության պատճառված վնասների հատուցման պահանջները:

-Եթե միակ բնակարանի արժեքն ավելին է քան սահմանված գումարը, ինչպե՞ս է կարգավորվում։

 -Այն դեպքերում, երբ բռնագանձման ենթակա բնակարանը քաղաքացու համար հանդիսանում է ա) մշտական բնակության միակ վայր, և բ) այդ բնակարանի գինը բարձր է 4.900.000 ՀՀ դրամից և իրացվել է 4.900.000 ՀՀ դրամից բարձր արժեքով՝ ի կատարումն պարտավորությունների, ապա բնակարանի իրացման արդյունքում գոյացված  գումարից 4.900.000 ՀՀ դրամը վերադարձվելու է պարտապան-քաղաքացուն, ընդ որում՝ այդ վերադարձված գումարի վրա ևս այլևս բռանագնձում չի տարածվելու՝ ի կատարումն պարտավորությունների կատարման:

-Ի՞նչ սկզբունքով է որոշվել նվազագույն գումարը։ Ինչո՞ւ 4.900.000։

 -Բռնագանձման ոչ ենթակա միակ բնակարանի նման նվազագույն շեմ՝ 4.900.000 ՀՀ դրամ է որոշվել՝ հաշվի առնելով երկու չափանիշ՝ բնակարանի նվազագույն մակերեսը և Հայաստանի Հանրապետության ամբողջ տարածքում բազմաբնակարան  բնակելի շենքերի բնակարանների 1մ² մակերեսի շուկայական միջինացված գինը: Մասնավորապես` որպես բնակարանի նվազագույն մակերես է դիտարկվել 40 մ², իսկ Հայաստանի Հանրապետության ամբողջ տարածքում բազմաբնակարան բնակելի շենքերի բնակարանների 1մ² մակերեսի շուկայական միջինացված գինը հաշվարկվել է Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեի պաշտոնական կայքէջում կոմիտեի կողմից հրապարկվող անշարժ գույքի շուկայի գնային և քանակային վերլուծության հիման վրա. ըստ կատարված հաշվարկների՝ 2017 թվականի մայիս ամսվա համար Հայաստանի Հանրապետության բազմաբնակարան բնակելի շենքերի բնակարանների 1մ² մակերեսի շուկայական միջինացված գինը ≈121 822  ՀՀ դրամ է:

-Սահմանված գումարն իսկապես բավական  է միակ բնակության վայր ունենալու համար։

-2017 թվականի մայիսին հանրապետության քաղաքներում, բացառությամբ Երևանը, վաճառված բազմաբնակարան բնակելի շենքերի բնակարանների առուվաճառքների (պայմանագրային) գների և առաջարկվող գների վերլուծության արդյունքում ձևավորվել են բազմաբնակարան բնակելի շենքերի բնակարանների հետևյալ շուկայական միջինացված գները` 1 մ² մակերեսի հաշվարկով.

2017 թվականի մայիսին Երևան քաղաքի վարչական շրջաններում վաճառված բազմաբնակարան բնակելի շենքերի բնակարանների առուվաճառքների (պայմանագրային) գների և առաջարկվող գների վերլուծության արդյունքում ձևավորվել են բազմաբնակարան բնակելի շենքերի բնակարանների հետևյալ շուկայական միջինացված գները` 1 մ² մակերեսի հաշվարկով.

Բազմաբնակարան բնակելի շենքերի բնակարանների շուկայական միջինացված վերոներկայացված գները հիմք ընդունելով՝ ակնհայտ է, որ նման կարգավորումը իսկապես լուրջ երաշխիք կարող է դառնալ հատկապես մարզերում բնակվող քաղաքացիների համար իրենց վերջին կացարանից չզրկվելու համար:

Աստղիկ Ավետիքյան

Մեկնաբանություններ