ՀՀ ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Վարդան Բոստանջյանը եւ հանձնաժողովի անդամ Արման Սաղաթելյանը օգոստոսի 1-ին հանդիպել են Իրանի Իսլամական Հանրապետության խորհրդարանի կրթության, հետազոտությունների եւ տեխնոլոգիաների հանձնաժողովի նախագահ Մոհամմադ Մեհդի Զահեդիի եւ հանձնաժողովի անդամների հետ, հայտնում է ԱԺ պաշտոնական կայքը:
Ողջունելով հյուրերին՝ Վարդան Բոստանջյանը կարեւորել է երկու երկրների ու ժողովուրդների միջեւ հազարամյակների ընթացքում ձեւավորված կայուն եւ հեռանկարային կապերն ու պատմամշակութային ընդհանրությունները, որոնք, ըստ նրա, կարեւոր խթան են քաղաքական, տնտեսական եւ մշակութային հարաբերություններն առավել զարգացնելու համար: Վարդան Բոստանջյանը միջպետական կապերի ամրապնդման համատեքստում արժեւորել է խորհրդարանական դիվանագիտության ներուժի արդյունավետ օգտագործումը, ինչը կարող է նոր լիցք հաղորդել առկա բարեկամական հարաբերություններին:
Հանդիպման ընթացքում անդրադարձ է կատարվել Իրանում հայ համայնքի գործունեությանը: Վարդան Բոստանջյանը գոհունակությամբ ընդգծել է, որ հայկական համայնքի նկատմամբ Իրանի իշխանությունները ցուցաբերում են ջերմ վերաբերմունք եւ կարեւորել այն հանգամանքը, որ Իրանի տարածքում գտնվող հայկական պատմամշակութային արժեքների պահպանությունը գտնվում է պետական հոգածության ներքո:
Հանձնաժողովի նախագահը հյուրերին ներկայացրել է գիտության, կրթության, սպորտի, մշակույթի, տեղեկատվական տեխնոլոգիաների ոլորտներում մեր երկրում իրականացված քայլերն ու ձեռքբերումները, կարեւորել իրանական կողմի հետ փոխշահավետ համագործակցությունը:
Վարդան Բոստանջյանը եւ Մոհամմադ Մեհդի Զահեդին ներկայացրել են երկու երկրների խորհրդարանների աշխատանքի առանձնահատկությունները, իրենց ղեկավարած հանձնաժողովների գործունեության ոլորտներն ու լիազորությունների շրջանակը:
Կողմերը նման հանդիպումները շարունակական դարձնելու, ինչպես նաեւ երկու երկրներում գիտության, կրթության, մշակույթի ոլորտներում իրականացվող ռազմավարական ծրագրերի ու քայլերի մասին միմյանց իրազեկելու պատրաստակամություն են հայտնել, ինչը համագործակցությունն առավել առարկայական դարձնելու հնարավորություն կտա:
