Ինչպես արդեն նշել էինք, ՓՊ նախագահի ընտրության ժամանակ լրագրողների հետ զրույցում Արա Զոհրաբյանը խոսեց Փաստաբանական պալատում տիրող իրավիճակի մասին: Վերջինս հայտվեց, որ առաջիկայում հանդես կգա համերաշխության կոչով: Նախագահի պաշտոնում վերընտրվելուց 5 օր անց կատարեց իր խոստումը:
«ՀԱՄԵՐԱՇԽՈՒԹՅԱՆ ԿՈՉ
Հարգելի գործընկերներ,
Համերաշխության կոչիս հասցեատերերը բոլոր այն փաստաբաններն են, ովքեր սուբյեկտիվ կամ օբյեկտիվ պատճառներով դժգոհ են կամ վիրավորված փաստաբանների պալատից կամ անձամբ ինձնից:
Ընդունում եմ, որ իդեալական չեմ աշխատում և ունեմ թերություններ:
Հարգում եմ յուրաքանչյուր քննադատություն, նույնիսկ եթե քննադատողն անձամբ չի կրում այդ գաղափարները կամ փաստացի գործում է իր կողմից առաջադրած գաղափարներին հակառակ:
Պատրաստ եմ ընդդիմախոսներիս հետ հարաբերությունները պարզել (լուծման նպատակով) իրենց համար ընդունելի ցանկացած ձևով, այդ թվում՝ հրապարակային՝ լրատվամիջոցների ներկայությամբ: Պատրաստ եմ (ընդդիմախոսներիս համաձայնության դեպքում) հրապարակել փաստաբանների պալատի նախորդ ժամանակահատվածի ֆինանսական բոլոր մանրամասները, որոնք վերաբերում են ինձ և ընդդիմախոսներիս:
Պատրաստ եմ նաև ընդդիմախոսներիս հետ ամեն ինչ սկսել նոր էջից՝ առանց հարաբերություններ պարզելու:
Կոչիս նպատակը մեկն է՝ ամրապնդել մեր միասնականությունը, այդ թվում՝ մեր բոլորի ներուժն ուղղել փաստաբանության զարգացմանը:
Մեր ուժը միասնության մեջ է:
Սպասում եմ Ձեր արձագանքին:
Հարգանքով՝
փաստաբան Արա Զոհրաբյան»:
