Առևտրի համաշխարհային կազմակերպության (ԱՀԿ) անդամ երկրները հերթական անգամ ձախողեցին յոթ դատավորներից բաղկացած ԱՀԿ Վերաքննիչ մարմնում թափուր աշխատատեղերը լրացնելու փորձը: Չորս թափուր պաշտոնների համար թեկնածուների ընտրությանը դեմ է քվեարկել ԱՄՆ-ն։ Կոնսենսուսի բացակայության պատճառով այդ հարցը չի լուծվել։
Ներկա պահին Վերաքննիչ մարմնում ներկայացված են յոթ արբիտրներից միայն երեքը: Կոնսենսուսի բացակայության պատճառով աշխատատեղերը չեն կարող լցվել, քանի որ ԱՄՆ-ն համառ կերպով մերժում է խնդրի լուծմանն ուղղված առաջարկները: ԱՀԿ-ում վերաքննիչ բողոքներ քննելու համար անհրաժեշտ են նվազագույնը երեք փորձագետներ։ Սակայն, եթե նրանցից մեկը հրաժարական տա, ԱՀԿ-ում Վերաքննիչ մարմնի աշխատանքը կդադարեցվի։
Օրեր առաջ ԱՀԿ-ի Վեճերի լուծման մարմնում Մեքսիկայի ներկայացուցիչը հանդես է եկել ԱՀԿ-ի 73 անդամների անունից և վերահաստատել է ԱՀԿ-ի Վեճերի լուծման մարմնի ներկայացրած առաջարկը` ընտրական հանձնաժողով ստեղծելու և Վերաքննիչ մարմնի նոր անդամներ նշանակելու մասին։ Ենթադրվում է, որ 30 օրվա ընթացքում պետք է նոր թեկնածուներ առաջադրվեն՝ թափուր աշխատատեղերը լրացնելու համար: ԱՀԿ-ում առկա այս իրավիճակի վերաբերյալ ընդհանուր մտահոգություն են հայտնել ԱՀԿ բոլոր անդամ երկրները։
Միևնույն ժամանակ, ԱՄՆ-ն հայտարարել է, որ երկիրը չի աջակցում Վերաքննիչ մարմնի վերաբերյալ ԱՀԿ-ի 73 անդամների նախաձեռնությանը: Ամերիկայի ներկայացուցիչը նաև նշել է, որ 15 տարիների ընթացքում ԱՄՆ-ն լուրջ մտահոգություն է հայտնել, քանի որ ԱՀԿ Վերաքննիչ մարմինը բազմիցս անտեսել է կազմակերպության կանոնները, մասնավորապես՝ խախտել է իր որոշումները կայացնելու համար հատկացված 90-օրյա ժամկետը: Վաշինգտոնը համոզված է, որ ԱՄՆ-ի մտահոգությունը միշտ անտեսվել է, իսկ Վերաքննիչ մարմնի կողմից կատարված խախտումները խաթարում են համակարգի օրինականությունը և վնասում են ԱՀԿ-ի բոլոր անդամների շահերին:
