Այսօր փաստաբանները 1 օրյա բողոքի ակցիա են կազմակերպել՝ ընդդեմ փաստաբանների նկատմամբ կիրառվող դատական տուգանքի: Այս կերպ փաստաբանները պահանջում են ՀՀ Ազգային ժողովից՝ Նախագծի և Նախագծին կցված մյուս օրենքների նախագծերից հանել դատական տուգանքին վերաբերող իրավակարգավորումները:
«Փաստաբաններին դատական տուգանքի ենթարկելու իրավակարգավորման մասին որևէ հիմնավորում առկա չէ այդ նախագծում»,- այս մասին Փաստաբնների պալատում տեղի ունեցած հանդիպման ժամանակ ասաց ՓՊ նախագահ Արա Զոհրաբյանը: Վերջինս նշեց, որ դա արվում է փաստաբաններին ճնշելու նպատակով:
«Ստացվում է, որ մեզ համար պարտադիր վարքագծի կանոն է սահմանվել մեկ ընթերցմամբ, ինչը հակասահմանադրական է: Փաստաբաններն այսօր գնացել են ամենածայրահեղ քայլերի՝ հրաժարվել են իրենց վստահորդներին պաշտպանելուց: Մենք հասկանում ենք, որ սա իրականում խնդիր է մեր մասնագիտական առաքելության համար, բայց, եթե այս տուգանքները ուժի մեջ մտան և այս տուգանքը դարձավ այլևս իրականություն, ապա վաղը փաստաբանը չի կարողանա արդյունավետ պաշտպանել իր վստահորդի շահերը: Վերջում դրանից տուժելու է վստահորդը»,- իր խոսքում նշեց Արա Զոհրաբյանը:
Արա Զոհրաբյանը նաև հայտնեց, որ հանդիպումներ պետք է տեղի ունենան ՀՀԿ խմբակցության, Ծառուկյան դաշինքի, Դաշնակցական խմբակցության ներկայացուցիչների հետ և կփորձեն կարգավորել այս հարցը:
ՓՊ խորհրդի անդամ Մելանյա Առուստամյանն էլ հայտնեց, որ փաստաբանները պետք է մոռանան իրենց միջև եղած տարաձայնությունները և միասնական գործեն. «Երբ միասնական ենք լինում անպայման հաղթում ենք»:
«Առանց ազդեցության գնահատման, առանց համալիր ուսումնասիրության ոչ մի իրավական նորմ իրավունք չունի մտնել հարաբերությունների կարգավորման դաշտ, քանի որ դրանք կարող են առաջացնել չափազանց անբարենպաստ հետևանքներ: Հուսով եմ, որ մեր օրենսդիրները և մեր Գործադիր իշխանության համապատասխան մարմինները կհասկանան, որ պատահական դիպվածային կարգավորումներով չէ, որ մենք պետք է դատական կայուն և արդյունավետ իշխանություն ձևավորեք»,- այս մասին էլ ասաց ՓՊ խորհրդի անդամ Տարոն Սիմոնյանը:
Վերջինս նշեց, որ, եթե ցանկանում ենք, որպեսզի փաստաբանությունն արդյունավետորեն նպաստի դատական իշխանության կայացմանն ու զարգացմանը, ապա որևէ պարագայում դիպվածային և հատվածական կարգավորումներ չպետք է մտցնել օրենսդրական կարգավորման դաշտ:
Նշենք, որ փաստաբանների բողոքի ակցիան տեղի կունենա սույն թվականի փոտրվարի 7-ին՝ ամբողջ օրը:
