Այսօր Շենգավիթ վարչական շրջանի ընդհանուր իրավասության դատարանում շարունակվեց «Սասնա ծռեր»-ի 11 անդամների գործով դատավարությունը՝ Էրեբունի և Նուբարաշեն վարչական շրջաննրի ընդանուր իրավասության դատարանի դատավոր Արթուր Օհանյանի նախագահությամբ:
Դատավորը նկատողություն արեց ամբաստանյալներ Մարտիրոս Հակոբյանի և Արայիկ Հակոբյանի պաշտպան Լուսինե Սահակյանին, քանի որ նա նախորդ դատական նիստին առանց զգուշացնելու լքել էր նիստերի դահլիճը:
Արթուր Օհանյանը Լուսինե Սահակյանին խորհուրդ տվեց ծանոթանալ փաստաբանի կանոնագրքի հետ, ինչը մյուս փաստաբանների վրդովմունքի առարկան դարձավ, իսկ Մուշեղ Շուշանյանը առարկեց վերջինիս «ապօրինի» գործողությունների դեմ. «Դուք իրավասու չեք մեզ խորհուրդ տալ և հիշեցնել, թե ինչ պետ է անենք»- ասաց Լուսինե Սահակյանը:
Հիշեցնենք, որ նախորդ դատական նիստին պաշտպաններ Լուսինե Սահակյանը և Երվանդ Վարոսյանը դատական նիստի ժամանակ, երբ դատավորն արդեն հեռանում էր խորհրդակցական սենյակ, ասացին, որ մեկ այլ գործ ունեն, սակայն դատավորն ասաց, որ պաշտպանների հայտարարությունը կքննի խորհրդակցական սենյակից վերադառնալուց հետո: Արդյունքում, պաշտպաններ Լուսինե Սահակյանը և Երվանդ Վարոսյանը լքել էին նիստերի դահլիճը՝ չսպասելով դատավորի վերադառնալուն:
Արամ Մանուկյանի պաշտպան Հարություն Բաղդասարյանը դատարանին միջնորդություն ներկայացրեց, որ դատարանը վերացնի իր պաշտպանյալի մերձավոր բարեկամների տեսակցությունների և հեռախոսազանգերի արգելանքը: Մեղադրող Արթուր Ճախոյանը պաշտպանի միջնորդության դեմ առարկեց՝ ասելով, որ հիմք չկա: Դատավոր Արթուր Օհանյանը միջնորդությունը բավարարեց և բարեկամների տեսակցությունների արգելանքը վերացրեց:
Նույնանման միջնորդություն ներկայացրեց Արամ Հակոբյանի պաշտպան Դավիթ Գյուրջյանը՝ պաշտպանյալի բարեկամների հետ տեսակցությունների և հեռախոսազանգերի արգելանքը վերացնելու համար: Դատարանը միջնորդությունը բավարարեց:
Դատարանն անցավ դատաքննության փուլին: Մեղադրողներ Արթուր Չախոյանը և Արամ Արամյանը ընթերցեցին մեղադրական եզրակացությունների եզրափակիչ մասը:
Ըստ մեղադրանքի եզրակացության ՝ Արամ Մանուկյանը մեղադրվում է, որ 2016 թվականի հուլիսի 17-ին կազմակերպված խմբի կազմում ապօրինի կերպով ձեռք է բերել, պահել, փոխադրել և կրել հրազեն ու ռազմամթերք, ապա կազմակերպված խմբի կազմում՝ զենքի գործադրմամբ կյանքի և առողջության համար վտանգավոր գործողությունների արդյունքում՝ զավթել և պահել է շենքեր, շինություններ և տրանսպորտի միջոցներ՝ զուգորդված դրանք ոչնչացնելու, վնասելու սպառնալիքով, ինչպես նաև նույն եղանակներով պատանդ է վերցրել և պահել երկուսից ավելի անձանց: Արամ Մանուկյանը, կյանքի համար վտանգավոր բռնություն գործադրելով, ինչպես նաև դրա գործադրման սպառնալիքով, հափշտակել է հրազեն ու ռազմամթերք, արդյունքում՝ հրկիզման եղանակով, դիտավորությամբ ոչնչացրել է տրանսպորտային միջոցներ:
Ըստ մեղադրական եզրակացության՝ Արամ Մանուկյանի հայրը՝ Պավել Մանուկյանը, Սեդրակ Նազարյանի և Աշոտ Պետրոսյանի հետ հանդիպել են բանակցելու նպատակով ՊՊԾ գնդի տարածք եկած ՀՀ փոխոստիկանապետ Վարդան Եղիազարյանի, Երևանի փոխոստիկանապետ Վալերի Օսիպյանի հետ, սակայն վերջիններիս պատանդ են վերցրել:
«Արամ Մանուկյանը պատանդ է վերցրել ՊՊԾ գնդի տարածք բուժօգնություն ցուցաբերելու նպատակով մուտք գործած երեք բուժաշխատողների»,-ասվում է մեղադրական եզրակացության մեջ:
Երբ մեղադրողներն ընթերցում էին մեղադրական եզրակացությունները՝ ամբաստանյալ Մարտիրոս Հակոբյանը բորբոքվեց՝ եզրակացության բովանդակությանը ծանոթանալով, վեր կացավ և փորձում էր նիստերի դահլիճից հեռանալ. «Ես չեմ կարում մնամ, լսեմ, էս ձեր կլաուզնիկ բաները»,- ասաց նա, ինչին ի պատասխան՝ դատավոր Արթուր Օհանյանը վերջինիս հորդորեց հանգստանալ և նստել տեղում, սակայն ամբաստանյալը շարունակեց. «Սանկցիա կիրառե՛ք, ես չեմ մնալու: Նախորդ նիստին ասել էի՝ էս բաշիբոզուկների երկրում չեմ ուզում շարունակել»,- ասաց նա: Դատավորն էլ շարունակեց վերջինիս կարգի հրավիրելու կոչեր անել, ինչին ի պատասխան «Դեդը» ասաց՝ «Անկարգը դուք եք»: Դատավորը սանկցիա կիրառեց և վերջինիս դատարանի նկատմամբ անհարգալից վերաբերմունքի պատճառով հեռացրեց նիստերի դահլիճից:
Ամբաստանյալ Արամ Մանուկյանը ևս արձագանքեց իրեն ուղղված մեղադրանքին. «Էս ամենը, ինչ-որ ասացիք, մեր հետ կապ չունի»,- ասաց նա և փորձեց լքել նիստերի դահլիճ:
Դատավորը հորդորեց նստել տեղում, սակայն Արամ Մանուկյանն ասաց, որ իրեն վատ է զգում, արդյունքում՝ նա ևս լքեց նիստերի դահլիճը:
Դատական նիստերի դահլիճը լքեց նաև Արայիկ Հակոբյանը:
Վարդան Գերավետյանը հայտարարության կարգով հանդես եկավ և ասաց, որ իրենք չեն պատրաստվում լսել մեղադրական եզրակացությունները, քանի որ դա շինծու է և ասաց, որ իրենք լքում են նիստերի դահլիճը, վերջիններիս պաշտպանները միացան: Ամբաստանյալները լքեցին նիստերի դահլիճը: Պաշտպան Լուսինե Սահակյանը դատարանին հայտեց, որ ինրենք լիազրոված են դատական նիստը շարունակեն առանց իրենց պաշտպանների:
Դատաքննության փուլը շարունակվեց առանց 11 ամբաստանյալների՝ դատավորի, 2 մեղադրողների և պաշտպանների ներկայությամբ:
Հաջորդ նիստը տեղի կունենա դեկտեմբերի 12-ին:
Նյութը՝ Ազնիվ Սիրադեղյանի
