Այսօր Ավան և Նոր Նորք վարչական շրջանների ընդհանուր իրավասության դատարանում շարունակվեց «Սասնա ծռեր»-ի 11 անդամների գործով դատավարությունը:
Այսօրվա դատական նիստում Աշտպան Արայիկ Պապիկյանը դատարանին ինքանբացարկի միջնորդություն ներկայացրեց՝ մնարամասնելով, որ դատարանը այս գործը քննելու համար չի կարող ոչ կանխակալ և անկողմնակալ լինել։ Փաստաբանը մանրամասնեց, որ գործից մաս անջատելու մասին որոշման մեջ դատարանը նշել է տուժողների իրավունքների մասին և աչքաթող է արել ամբաստանյալների և նրանց պաշտպանների շահերը:
«Հիմա ի՞նչ Ձեր գործից մաս անջատելու և միավորելու որոշման միջոցով ավելացավ մեր մակարդակը, գուցե՞ ավելի կարգապահ ենք դարձել: Դատավոր Գաբրիելյանը ոչ թե ծավալ փոքրացրեց, այլ ավելացրեց ևս 46 հատոր գործ: Մենք արդեն չենք կարող խոսել գործի քննության ողջամիտ ժամկետի մասին, որի մասին ամբաստանյալները կարող են միայն երազել»,-միջնորդությունը հիմնավորեց Արայիկ Պապիկյանը:
Ինքնաբացարկի միջնորդությանը միացավ նաև պաշտպան Արա Ղարագյոզյանը.
«Եթե այս ձևով դատական նիստերը շարունակվեն, ապա դրանք կտևեն 7 տարի ու մեր պաշտպանյալները 7 տարի կմնան կալանքի տակ: Դուք կանխակալ եք և աչք եք փակում պաշտպանների նկատմամբ իրականացող անօրինականությունների վրա: Դուք առանց պաշտպանների նիստ էիք անում: Պարոն դատավոր, Դուք լավ հասկանում էիք , որ այս գործով չեք կարող արդարադատություն իրականացնել, բայց համարձակություն չունեցաք ինքնաբացարկի միջնորդությունը հարգել և հեռանալ»,-ասաց Արա Ղարագյուլյանը:
Փաստաբանները անդրադարձան նաև դատարանի վիճարկվող որոշման մեջ՝ գործից մաս անջատելու նպատակահարմարության վերաբերյալ դիտարկմանը, ըստ որի` մաս անջատելը պայմանավորված է ողջամիտ ժամկետում գործը քննելու անհրաժեշտությամբ։
Ըստ փաստաբան Արայիկ Պապիկյանի՝ դատարանը 4 ամիս դատական նիստերի ձախողման «մեղքը» գցել է պաշտպանական կողմի վրա, մինչդեռ, ըստ ամբաստանյալների պաշտպանների, սակայն ակնհայտ է, որ դատարանն է ձախողել դատական նիստերը:
Միջնորդությանը միացան նաև մյուս պաշտպանները: Դատարանը 30 րոպե ընդմիջում հայտարարեց, որից հետո վերադարացավ և հրապարակեց միջնորդությունը մերժելու մասին որոշումը:
Ինքնաբացարկի միջնորդության մերժումից հետո դատարանն անցավ ամբաստանյալների ինքնության ճշտման և պաշտպաններին գործի մեջ ներգարվելու գործընթացներին:
Հետո դատավոր Արտուշ Գաբրիելյանը անդրադարձավ ամբաստանյալ Կարո Եղնուկյանի պաշտպան Տիգրան Հայրապետյանի 4 ամիս առաջ արված միջնորդությանը:
Տիգրան Հայրապետյանը անդրադարձավ Կարող Եղնուկյանի մեղադրական եզրակացությանը, նշելով որ մի քանի հազար էջանոց մեղադրական եզրակացության մեջ ընդհամենը 60 էջն է վերաբերվում Կարո Եղնուկյանին, ուստի միջնորդություններ ունի իր պաշտպանյալի վերաբերյալ: Առաջին միջնորդությունը վերաբերվում է Կարող Եղնուկյանի նկատմամբ խափանման միջոց կալանավորումը փոխարինել գրավի դիմաց ազատ արձակման, երկրորդ՝ գործից մաս անջատել, և երրորդ՝ վերացնել հանդիպումների և հեռախոսազանգերի արգելքը:
Դատավոր Արտուշ Գաբրիելյանը բավարարեց տեսակցությունների և հեռախոսազանգերի արգելքի վերացման մասին պաշտպանների միջնորդությանը, և նույնիսկ մյուս ամբաստանյալների նկատմամբ հեռախոսազանգերի և տեսակցությունների արգելքը վերացնելու մասին որոշում կայացրեց:
Հաջորդ միջնորդությունը վերաբերվում էր ամբաստանյալ Կարո Եղնուկյանի նկատմամբ խափանման միջոց կալանավորումը փոխարինել գրավի դիմաց ազատ արձակելով:
Տիգրան Հայրապետյանը ներկայացրեց այն բոլոր արարքները որոնց մեջ մեղադրվում է իր պաշտպանյալը, անհիմն և ոչ հիմնավորված համարելով վերջիններս.
«Կարո Եղնուկյանին մեղադրում են այն բանի մեջ, որ տեղեկություն է հրապարակել զինտեխնիկայի տեղաշարժման վերաբերյալ: Մեղադրական եզրակացության մեջ նշվում է տեղեկություն հրապարակելուն նպաստել է, սակայն՝ ինչպե՞ս է նպաստել, դա չգիտենք: Կամ մեղադրվում է, որ Արամ Պետրոսյանի հեռախոսահամարը լիցքավորել է 13 000 դրամով, եթե այս մասը հիմնավորված է, մեզ կարող եք ասել՝ վերջինս ինչպե՞ս կարող էր օժանդակել շենք շինություն զավթելուն»,-ասաց Տիգրան Հայրապետյանը: «Կարո Եղնուկյանի համար ստորագրությամբ երաշխավորել են Հայաստանում հայտնի շուրջ քառասուն անձինք, որոնց շարքում են Մարդու իրավունքների երկու նախկին պաշտպաններ, պատգամավորներ, անվանի մարդիկ: Որպես գրավ առաջարկում ենք աննախադեպ գումար՝ մեկ միլիոն դոլար արժողությամբ անշարժ գույք»,-նշեց Տիգրան Հայրապետյանը:
Պաշտպանը փաստեց, որ Կարո Եղնուկյանը դատաքննական պրոցեսին չի կարող խոչընդոտել ազատության մեջ լինելով: Մյուս պաշտպանները ևս միացան Տիգրան Հայրապետյանի միջնորդությանը:
Հերթական ընդմիջումից հետո դատրանը մերժեց միջնորդույթունը, առանց հիմնավորելու մերժելու պատճառները:
Տիգրան Հայրապետյանը ներկայացրեց երրորդ միջնորդությունը՝ Կարո Եղնուկյանի գործով մաս անջատելու վերաբերյալ, սակայն դատարանը կրկին մերժեց միջնորդությունը:
Ամբաստանյալներ Արմեն Լամբարյանի և Աշոտ Պետրոսյանի պաշտպան Արայիկ Պապիկյանը ևս միջնորդությւոն ներկայացրեց, որ իր պաշտպանյալների նկատմամբ կիրառված կալանումը որպես խափանման միջոց փոխարինել գրավի դիմաց ազատ արձակելով:
Ամբաստանյալ Կարո Եղնուկյանը ոտքի կանգնեց և դատարանին հայտնեց իր նիստերի դահլիճից հեռանալու մասին. «Դուք իմ հանդեմ հոգեբանական բռնություն եք գործադրում»,-ասաց նա: Դատարանը հեռացավ խորհրդակցական սենյակ Արայիկ Պապիկյանի միջնորդության վերաբերյալ որոշում կայացնելու նպատակով:
Նշենք, որ նիստը վերսկսելուց հետո ամբաստանյալ Կարո Եղնուկյանը նիստերի դահլիճ չբերվեց, վերջինիս պաշտպանը դատարանում հայտնեց, որ նա վատառողջ է:
Ամբաստանյալներ Արմեն Լամբարյանի և Աշոտ Պետրոսյանի պաշտպան Արայիկ Պապիկյանի միջնորդությունը դատարանը՝ դատավոր Արտուշ Գաբրիելյանի նախագահությամբ մերժեց:
Նիստը հետաձգվեց ամբաստանյալ Կարո Եղնուկյանի բացակայության պատճառով հետաձգվեց, հաջորդ նիստը տեղի կունենա նոյեմբերի 2-ին:
Նյութը՝ Ազնիվ Սիրադեղյանի:
