«Մենք կոչ ենք անում իշխանություններին, որ «Վեոլիա ջուր» ֆրանսիական մասնավոր ընկերության հետ պայմանագիր ստորագրելուց առաջ լավ մտածեն, համապատասխան աուդիտ անցկացնեն. համոզված ենք, որ շատ չարաշահումներ կհայտնաբերվեն», – այսօր նմանատիպ հայտարարությամբ հանդես եկան «Ժողովրդի ձայն» ՀԿ անդամներ Ծովինար Կոստանյանն ու Արման Ղուկասյանը:
2017թ հունվարի 1-ից ջրի սակագինը թանկացավ, օգոստոսին հայտնի դարձավ, որ «Վեոլիա ջուր» ընկերությունը կրկին սակագնի բարձրացման հայտ է ներկայացրել Հանրային ծառայությունները կարգավորող հանձնաժողովին, առաջարկելով ջրի սակագինը բարձրացնել 14 դրամով՝ 180 դրամից դարձնել 194 դրամ: Հանձնաժողովն ունի 90 օր, որպեսզի բավարարի կամ չեղարկի հայտը:
«Վեոլիա ջուր»-ը թանկացման մի քանի պատճառաբանություններ է առաջ քաշում, մասնավորապես գնաճի խնդիրը. «Ըստ Ազգային վիճակագրության տվյալների, 6 ամսվա տվյալներով գնաճը շատ չնչին է եղել՝ 0,5-0,9%, այնինչ՝ ընկերությունը պատրաստվում է միանգամից 8%-ով բարձրացնել ջրի սակագինը»,- ասաց Ծովինար Կոստանյանը:
Թանկացման հաջորդ փաստարկն է ծավալների նվազումը, սակայն, բանախոսներն այս պատճառաբանությունը ևս անհիմն են համարում՝ նշելով, որ տեղի է ունեցել հակառակ գործընթացը՝ 1,2%-ով աճ է գրանցվել:
«Ի տարբերություն էլեկտրաէներգիայի սակագնի բարձրացմանը, այս անգամ համատարած լռություն է տիրում ինչպես ակտիվ երիտասարդների, այնպես էլ տնտեսագետների շրջանում: Ինձ համար անհասկանալի է, թե երկրի ընդդիմություն համարվող «Ելք» դաշինքն ինչո՞ւ է մինչ օրս լուռ: Մենք, որպես ՀՀ քաղաքացիներ, փորձելու ենք ամեն ինչ անել, արպեսզի այս անգամ ժողովրդի գրպանից չհարստացնեն ուրիշներին»,- նշեց Արման Ղուկասյանը:
Դեռ հունվար ամսին տեղի ունեցած թանկացումը «Վեոլիա ջուր» ընկերությունը բացատրեց աշխատանքների բարելավմամբ, սակայն մինչ օրս տեխնիկական և որակային բազում խնդիրներ կան՝ ջրանջատումներ, տեխնիկական թերի սպասարկում, հին խողովակաշարերի առկայություն և այլն:
Նյութը՝ Ռոզա Վարդանյանի
