ՊՊԾ գունդը գրաված «Սասնա Ծռեր» խմբավորման 14 անդամների գործով դատական նիստն հետաձգվեց 30 րոպեով: Այս անգամ ևս փաստաբանները հանդիպեցին նույն խոչընդոտին, ինչ նախորդ նիստերի ժամանակ: Փաստաբանների մեծ մասը չկարողացավ մուտք գործել դատարան, քանի որ կարգադրիչները փորձում էին զննել նրանց պայաուսակները:
Նիստն սկսվելուց անմիջապես հետո, դատավորը ընթերցեց զննության վերաբերյալ արձանագրությունները, որից հետո տեղից խոսելու համար սանկցիա կիրառեց ամբաստանյալ Արայիկ Խանդոյանի նկատմամբ, այնուհետև, 6 ժամով հեռացրեց նիստերի դահլիճից: Այս առնչությամբ ամբաստանյալի պաշտպան Արա Ղարագյոզյանը դատարանին հայտնեց, որ իր պաշտպանյալը ընդամենը ջուր էր ցանկանում, քանի որ ուներ առողջական խնդիրներ:
Այնուհետև դատարանը հեռացավ խորհրդակցական սենյակ` փատաբանների վարքի վերաբերյալ որոշում կայացնելու համար: 45 րոպե անց դատավորը դատական սանկցիա կիրառեց պաշտպաններ Մուշեղ Շուշանյանի և Լուսինե Սահկայանի նկատմամբ:
Պաշտպան Արայիկ Պապիկյանն էլ գրություն ներկայացրեց դատարարան, համաձայն որի` առանց իր պաշտպանյալի, ինքը չի կարող մասնակցել նիստին: Դատարանը նորից հեռացավ խորհրդակցական սենյակ՝ Արայիկ Պապիկյանի վարքի վերաբերյալ որոշում կայացնելու համար:
Նիստն ընդհատվեց 30 րոպեով, որից հետո դատավորը դատական սանկցիա կիրառեց Արայիկ Պապիկյանի նկատմամբ:
Պաշտպան Արա Զաքարյանը հանդես եկավ առաջարկով, որ նիստը տեղի ունենա արդարացի կերպով` միջնորդելով նիստը հետաձգել, վերացնել խուզարկելու գործընթացը և լուծել առաջ եկած խնդիրները. «Եթե մեկ դատախազ ներկա չլիներ, նորի՞ց շարունակելու էիք նիստը, պարո՛ն դատավոր: Ինչպե՞ս կարող եք նիստը շարունակել առանց փաստաբանների»:
Նիստին ներկա մյուս պաշտպանները ևս միացան այս միջնորդությանը` համարելով, որ առանց պաշտպանների նիստը շարունակելն անօրինական է:
Դատավոր Արտուշ Գաբրիելյանը որոշեց հետաձգել նիստը: Հաջորդ նիստը տեղի կունենա սեպտեմբերի 13-ին:
Հիշեցնենք, որ 2016թ. հուլիսի 17-ին «Սասնա Ծռեր» խմբավորման 31 անդամները զինված հարձակում էին գործել ՊՊԾ գնդի վրա:
Նյութը՝ Ելենա Արամյանի
