Երևանի քաղաքապետ Տարոն Մարգարյանի հրավիրած աշխատանքային խորհրդակցության ժամանակ քննարկվել են սոցիալական ապահովության ոլորտի, մասնավորապես սոցիալական աջակցության տարածքային բաժինների գործունեության հետ կապված հարցեր: Խորհրդակցությանը մասնակցել են Երևանի քաղաքապետի առաջին տեղակալ Կամո Արեյանը, քաղաքապետարանի աշխատակազմի քարտուղար Սերգեյ Մակարյանը, աշխատակազմի համապատասխան ստորաբաժանումների պետերը, մայրաքաղաքի վարչական շրջանների ղեկավարներն ու սոցիալական աջակցության տարածքային բաժինների պետերը:
Պատասխանատուները քաղաքապետին են ներկայացրել ոլորտում իրականացվող աշխատանքների ընթացքը, ինչպես նաև առաջիկա անելիքները:
Ամփոփելով ներկայացված զեկույցները՝ քաղաքապետի կողմից տրվել են մի շարք հանձնարարականներ՝ աշխատանքները պատշաճ կազմակերպելու, նկատված թերացումներն արագորեն շտկելու, ինչպես նաև իրենց աշխատանքներում թերացող առանձին աշխատակիցների նկատմամբ կարգապահական տույժեր կիրառելու վերաբերյալ:
Հաշվի առնելով ոլորտի առանձնահատկությունները՝ քաղաքապետ Տարոն Մարգարյանը բոլոր պատասխանատուներին հանձնարարել է նաև մշտական հսկողություն սահմանել աշխատանքների նկատմամբ, անապահովության գնահատման համակարգում հաշվառված քաղաքացիների սոցիալական աջակցության ծրագրերի իրականացման ընթացքում ապահովել հասցեականությունը և օրենսդրության պահանջների պատշաճ կատարումը:
