Այս նպատակով զրուցել ենք ELL գործընկերության գործընկեր, միջազգային իրավունքի մասնագետ, ի․գ․թ․ Գևորգ Տումանովի հետ։
-Կարո՞ղ է արդյոք ՀՀ-ից ցանկացած մարդ առցանց գնել Powerbal վիճակախաղի տոմս։
– Ոչ, չի կարող։ Multi-State վիճակախաղի ասոցիացիան, որն էլ հենց ղեկավարում է Powerball –ը, պաշտոնապես տեղեկացրել է այդ մասին։ Հեշտ գումար ձեռք բերելու հույսով մարդիկ Powerball-ի մոլուցքով են համակվել։ Սա հանգեցրել է նրան, որ բազմաթիվ մարդիկ խաբեության զոհ են դառնում։
-Իսկ ո՞ւմ է վերաբերում առցանց տոմսերի վաճառքը։
– Վիճակախաղի ասոցիացիան հայտարարել էր, որ յուրաքանչյուր նահանգ իրավունք ունի խաղալու կամ տարածելու վիճակախաղը։ Ներկայում միայն Ջորջիայում և Իլինոյիսում են թույլատրում առցանց վաճառել Powerball-ի տոմսեր, բայց պարտադիր պայմանն է տվյալ նահանգի ռեզիդենտ լինելը և տոմսը գնելու պահին տվյալ նահանգում ֆիզիկապես գտնվելը։
-Հնարավո՞ր է խնդրել որևէ մեկին գնել և փոստով կամ այլ տարբերակով ուղարկել տոմսը։
– Իսկական տոմսերը հնարավոր է ձեռք բերել միայն Միացյալ Նահանգների տարածքում գտնվող Powerball վիճակախաղի տոմսարկղերից և դրանք վաճառելու իրավասություն ունեցող վաճառակետերից։ Արգելվում է վաճառել տոմսերը փոստով կամ առցանց ԱՄՆ-ի տարածքից դուրս։
Թեև կան կայքեր, որոնք պնդում են, թե իրենք էլ են վաճառում Powerball-ի տոմսեր, սակայն գնորդները խաբեության զոհ դառնալու և անպետք թղթի վրա գումար վատնելու վտանգի առջև են։
