Իրանի Իսլամական Հանրապետությունը դատական հայց կներկայացնի Հաագայում ՄԱԿ-ի միջազգային դատարան՝ ընդդեմ Միացյալ Նահանգների՝ Իրանի միջուկային ծրագրի շուրջ գործարքից դուրս գալու արդյունքում Թեհրանին պատճառված վնասի փոխհատուցման գործով: Այս մասին հայտարարել է Իրավական իսլամական հանրապետության իրավական հարցերով փոխնախագահ Լայա Ջոնեյդին։ Նրա խոսքերով, դատական հայց ներկայացնելու համար իրանական տնտեսության տարբեր ոլորտների գործակալներին առաջարկվել է գնահատել վնասը, որը երկրին պատճառվել է ԱՄՆ-ի իրականացրած միակողմանի գործողությունների արդյունքում։ Իրանի կառավարությունը մտադիր է վնասի հատուցման համար հավաքագրել և դատարան ներկայացնել փաստաթղթերի ամբողջական փաթեթը։
Ավելի վաղ, Իրանը դիմել է ՄԱԿ-ի միջազգային դատարան՝ երկու երկրների միջև դատավարության ժամանակահատվածում ԱՄՆ-ի դեմ ժամանակավոր միջոցներ կիրառելու խնդրանքով: 2018 թվականի հոկտեմբերի 3-ին ՄԱԿ-ի միջազգային դատարանը մասնակի բավարարել է այդ միջնորդությունը: Համաձայն դատավճռի, Վաշինգտոնը պետք է վերացնի ցանկացած խոչընդոտ` Իրանի տարածք դեղորայքի և բժշկական պարագաների, սննդի և գյուղատնտեսական արտադրանքի, ինչպես նաև քաղաքացիական ավիացիայի անվտանգության համար անհրաժեշտ պահեստամասերի, սարքավորումների ազատ ներմուծման համար։
