Հունիսի 30-ից Ռուսաստան մեկնող ոչ վիզային ռեժիմի երկրների քաղաքացիները պետք է 72 ժամ առաջ իրազեկեն այդ պետությանն իրենց այցի մասին։ Սա վերաբերում է նաև ԵԱՏՄ անդամ երկրների քաղաքացիներին: Հայտնել է «Հայկական Կարիտաս» կազմակերպության միգրացիոն ծրագրի փորձագետ Տաթևիկ Բեժանյանը և հավելել՝ նոր կարգը պայմանավորված է Ռուսաստանի միգրացիոն օրենսդրության փոփոխություններով։ Գրանցում և նույնականացում իրականացնելու համար գործարկվելու է RuID միասնական բջջային հավելվածը։
«Քաղաքացին պարտավոր է լինելու՝ անկախ Ռուսաստան մեկնելու նպատակից, մեկնելուց ոչ ուշ քան 72 ժամ առաջ, իսկ արտակարգ դեպքերում ոչ ուշ քան 4 ժամ առաջ այդ հավելվածի միջոցով տեղյակ պահել երկիր մուտք գործելու ժամկետների մասին: Բջջային հավելվածում անձն իր համար բացելու է էջ, որտեղ լրացնելու է իր տվյալները և դիմում է ներկայացնելու այն մասին, որ պատրաստվում է 72 ժամ հետո մուտք գործել Ռուսաստան»,- ներկայացրել է Բեժանյանը։
Դիմումի հիման վրա ՌԴ համապատասխան մարմինները կուսումնասիրեն քաղաքացու տվյալները: Մուտքի թույլտվության դեպքում անձը կստանա հատուկ կոդ, որը պետք է ներկայացնի սահմանային վերահսկողություն իրականացնող աշխատակիցներին:
Անհրաժեշտ է հաշվի առնել, որ առանց այս կոդի անհնար կլինի մուտք գործել Ռուսաստանի Դաշնություն:
