Ծառուկյան դաշինքի պատգամավոր Վարդան Բոստանջյանը բնական է համարում Ադրբեջանի հնարավոր անդամակցությունը ԵԱՏՄ-ին: Ըստ նրա՝ ՌԴ-ն խոշոր երկիր է, դարեր շարունակ մեծ ազդեցության ունեցող ոլորտ է ոլորտ ձևավորվել, որտեղ գտնվել են նաև Ադրբեջանն ու Հայաստանը:
«Ռուսաստանը կցանկանա, որ իր ազդեցության շրջանակները չփոքրանան, հետևաբար ոչ միայն Հայաստանին պետք է ամրագրի որպես ռազմավարական ընկեր, այլ նաև Ադրբեջանին, քանի որ նա ռեսուրսներով հարուստ երկիր է»,-ասաց նա:
Վարդան Բոստանջյանը հավելեց, որ քաղաքականության մեջ չկա այն մոտեցումը, որ այս մի երկրին շատ եմ սիրում, այն մյուսին՝ քիչ.
«Կան շահեր, և ես բնական եմ համարում Ռուսատանի Դաշնության կեցվածքն ու մոտեցումը: Եթե Ռուսաստանին հաջողվի ազդեցության ոլորտի պահպանության առումով, այդ նույն հզոր երկիրը գրեթե կբացառի ընդհարումը և թույլ չի տա՝ ինչպես Հայաստանի, այնպես էլ Ադրբեջանի համար»,-ասաց նա:
Պատգամավորն Անդրադարձավ նաև վերջին շրջանում Հայաստանում նկատվող թանկացումներին՝ նշելով, որ երևույթն ունի ինչպես օբյեկտիվ, այնպես էլ` սուբյեկտիվ պատճառներ. «Օլիգոպոլ ցանկությունները և մոնոպոլ նկրտումները Հայաստանում գերակայում են, ինչը բերում է մի շարք բացասական հետևանքների, ինչպես օրինակ՝ ապրանքների գների բարձրացման: Տնտեսվարողները մշտապես շահ են հետապնդում: Մենք կոլապսային վիճակում հայտնված մի երկիր ենք»,- ասաց նա հավելելով, որ Հայաստանում լուրջ խնդիր է ստվերային տնտեսությունը:
Նյութը՝ Ազնիվ Սիրադեղյանի
