Երեկ Իմ քայլը նախաձեռնության առաջնորդ Նիկոլ Փաշինյանը Հանրապետության հրապարակից հայտարարեց, որ վարչապետի ժամանակավոր պաշտոնակատար Կարեն Կարապետյանը չի կարող արտակարգ դրություն հայտարարել, մասնավորապես, ասելով. «Նա հանկարծ չհամարձակվի վարչապետի լիազորություններ իրեն վերագրել։ Դա կարող է համարվել նույնիսկ քրեական հանցագործություն»:
Legalinfo.am- ի խնդրանքով «Ի-էԼ-ԷԼ գործընկերություն» իրավաբանական գրասենյակի իրավաբան Ռուզաննա Հարությունյանը պարզաբանում է։ Ըստ նրա մեկնաբանության.
Վարչապետի կողմից իր լիազորությունների կատարման անհնարինության դեպքում առաջին փոխվարչապետի կողմից վարչապետին փոխարինելու իրավահարաբերությունները կանոնակարգվում են «Կառավարության կառուցվածքի և գործունեության մասին» ՀՀ օրենքով, ինչպես նաև Վարչապետի՝ թիվ 412-Լ «Վարչապետին փոխարինելու և վարչապետի կողմից իր լիազորությունների կատարման անհնարինության դեպքում առաջին փոխվարչապետի կողմից վարչապետին փոխարինելու» կարգով:
Վերոնշյալ «Կառավարության կառուցվածքի և գործունեության մասին» ՀՀ օրենքի 7-րդ հոդվածի 12-րդ մասի համաձայն՝ Վարչապետը սահմանում է իր բացակայության ժամանակ առաջին փոխվարչապետի կողմից վարչապետին փոխարինելու կարգը, այդ թվում, վարչապետին փոխարինող առաջին փոխվարչապետի լիազորությունների ծավալը: Այդ կարգով պետք է սահմանվի նաև վարչապետի կողմից իր լիազորությունների կատարման անհնարինության դեպքում առաջին փոխվարչապետի կողմից վարչապետին փոխարինելու կարգը:
Նշված դրույթին համապատասխան էլ Վարչապետի կողմից ընդունվել է թիվ 412-Լ «Վարչապետին փոխարինելու և վարչապետի կողմից իր լիազորությունների կատարման անհնարինության դեպքում առաջին փոխվարչապետի կողմից վարչապետին փոխարինելու» կարգը, որի II գլխի 5-րդ և 6-րդ կետերի համաձայն՝ «Կառավարության կառուցվածքի և գործունեության մասին»Հ այաստանի Հանրապետության օրենքի 7-րդ հոդվածի 12-րդ մասի 14-րդ մասով սահմանված դեպքում Կառավարության որոշման հիման վրա վարչապետի կողմից իր լիազորությունների կատարման անհնարինության դեպքում վարչապետին փոխարինում է առաջին փոխվարչապետը:
Վարչապետի կողմից իր լիազորությունների կատարման անհնարինության դեպքում վարչապետին փոխարինող առաջին փոխվարչապետն իրականացնում է վարչապետի՝ Սահմանադրությամբ և օրենքներով սահմանված բոլոր լիազորությունները:
Այսպես, տվյալ իրավիճակում, Կառավարության թիվ 470-Ա որոշմամբ կայացվել է որոշում ՀՀ վարչապետ Սերժ Սարգսյանի կողմից իր լիազորությունների կատարման անհնարինության մասին, հետևաբար՝ Սերժ Սարգսյանի լիազորությունները դադարեցվել են «Կառավարության կառուցվածքի և գործունեության մասին» ՀՀ օրենքի 7-րդ հոդվածի 12-րդ մասը նույն օրենքի 14-րդ մասով սահմանված կարգով՝ Կառավարության որոշմամբ, և հետևաբար՝ ստեղծված իրավիճակում կիրառելի են արդեն հիշատակված դրույթները: Իսկ այդ դրույթների ուժով էլ Կարեն Կարպեատյանը՝ որպես վարչապետ Սերժ Սարգսյանի «հրաժարականի» պահին գործող առաջին փոխվարչապետ, իրավասու է իրականացնել վարչապետի՝ Սահմանադրությամբ և օրենքներով սահմանված բոլոր լիազորությունները:
Հարկ է նկատել, որ վերոնշյալ կանոնակարգումները տարածվում են առկա իրավահարբերությունների նկատմամբ, քանի որ ՀՀ վարչապետ Սերժ Սարգսյանի լիազորությունները դադարեցնող ՀՀ Կառավարության վերոնշյալ 470-Ա որոշման ուժով ՀՀ վարչապետ Սերժ Սարգսյանը ոչ թե հրաժարական է տվել, այլ այդ որոշմամբ փաստվել է ՀՀ վարչապետ Սերժ Սարգսյանի կողմից իր լիազորությունների կատարման անհնարինության մասին: Վերոնշյալի մասին է հավաստում նաև այն հանգամանքը, որ այդ որոշման մեջ որպես իրավական հիմք հղում է կատարվել «Կառավարության կառուցվածքի եւ գործունեության մասին» ՀՀ օրենքի 7-րդ հոդվածի 14-րդ մասին, որը կարգավորում է Վարչապետի կողմից իր լիազորությունների կատարման անհնարինության մասին որոշման կայացման կարգը, այլ ոչ թե Վարչապետի հրաժարականի մասին որոշման կայացման կարգը: Դեռ ավելին, Սերժ Սարգսյանի կողմից «Որպես երկրի ղեկավար դիմում եմ վերջին անգամ» հայտարարության մեջ առկա չէ որևէ նշում իր կողմից հրաժարական տալու մասին:
