«Սասնա ծռեր»-ին օժանդակելու մեջ մեղադրվող Կարո Եղնուկյանի պաշտպան Տիգրան Հայրապետյանի խոսքերով` ընտանիքի հանդեպ ակնհայտ ընդգծված բացասական վերաբերմունք է դրսևորվում.
«Սա ոչ թե մի օրվա, այլ չորս տարվա ընդգծված վերաբերմունք է ընտանիքի անդամների նկատմամբ»,-նշեց պաշտպանը` անդրադառնալով Կարող Եղնուկյանի ընտանիքի անդամների նկատմամբ վերջին ճնշումներին,- «Դա եղավ այն ժամանակ, երբ նրանք Հայաստան-Սփյուռք համաժողովից առաջ ցանկացել էին տեղեկացնել, որ սփյուռքահայեր Կարո Եղնուկյանը և Ժիրայր Սեֆիլյանը կալանավորված են իրենց քաղաքական հայացքների համար: Սակայն ընտանիքի անդամներին դա չի հաջողվել, միանգամից բերման էին ենթարկել ոստիկանության Կենտրոնի բաժին»:
«Բաժնում խառնաշփոթ էր տիրում, առանձին սենյակներում բոլորիս նստեցրին: Միայն անձնական տվյալներ էին ճշտում, մեկը մյուսի վրա էր գոռում: Այդ ժամանակ ՄԻՊ ներկայացուցիչները մոտեցան, և միայն 4 ժամ անց ընթերականեր բերեցին: Ես դրսից եմ իմացել, որ այլ պատրվակով էին բերել՝ պայթուցիկ նյութ կրելու կասկածանքով»,- ասաց Կարո Եղնուկյանի կինը՝ Ռուզաննա Եղնուկյանը:
Ըստ նրա՝ եթե իրենց բերման էին ենթարկում պայթուցիկ նյութ կրելու կասկածանքով, ինչո՞ւ հենց սկզբից խուզարկություն չեն արել: Ռոզաննա Եղնուկյանը հավելեց, որ չի զարմանա, եթե վաղը, մյուս օրն իրենց մեքենայից, տանիքից կամ ավտոտնակից ինչ-որ բան գտնեին ու ասեն՝ «Տեսե՛ք, պայթուցիկը գտանք մենք»:
Կարո Եղնուկյանի աղջիկա՝ Էլմոնեի խոսքերով՝ իրեն բերման ենթարկելուց 4 ժամ անց են ցանկացել խուզարկել.«Խուզարկությունը, որպես էդպիսին խայտառակություն էր, եկավ ոստիկանության կին ներկայացուցիչը ու հարցրեց՝ բալիկ ջան, չստուգեմ ներքնազգեստդ, ինձ ասա՝ բան ունես մոտդ պահած, թե՞ չէ»:
Տիգրան Հայրապետյանի խոսքերով, եթե ըստ էության, եղել է սուտ մատնություն Եղնուկյանների ընտանիքի նկատմամբ, ապա այդ անձը պետք է քրեական պատասխանատվության ենթարկվի. «Եթե չի եղել սուտ մատնություն, ապա ոստիկանները պետք է քրեական պատասխանատվության ենթարկեն կեղծ ապացույցներ ձեռք բերելու համար»,-ասաց նա:
Մյուս պաշտպանը՝ Նինա Կարապետյանցի խոսքերով՝ ոչ մի տրամաբանություն չկա «Սասնա ծռեր»-ին օժանդակելու մեջ մեղադրվող Կարո Եղնուկյանի երեխաներին և ընտանիքին բերման ենթարկելու գործընթացի մեջ. «Այնքան ապաշնորհ են մեր իշխանությունները, որ նորմալ գործ չեն կարողանում սարքել, այս աստիճանի բացահայտ հետապնդում են իրականացնում»,- ավելացրեց նա։
Բերման ենթարկելու բարոյական վնասի փոխհատուցման համար դիմում է ներկայացվել Վարչական դատարան:
Նյութը՝ Ազնիվ Սիրադեղյանի
