Երևանի ընդհանուր իրավասության դատարանի Շենգավիթի նստավայրում՝ կաշառք ստանալու մեջ մեղադրվող դատավոր Իշխան Բարսեղյանի գործով դատական նիստը հետաձվեց, քանի որ դատարան չէր ներկայացել ամբաստանյալ Էլզա Զաքարյանը:
Վերջինիս պաշտպանը դատարանին խնդրեց հետաձգել նիստը՝ հայտնելով, որ իր պաշտպանյալը վատառողջ է և չի կարող ներկայանալ նիստին, իսկ հաջորդ նիստի ժամանակ կներկայացնեն համապատասխան փաստաթղթեր:
Դատավոր Վաչե Մարգարյանը որոշեց նիստը հետաձգել:
Նշենք, որ Իշխան Բարսեղյանի և Էլզա Զաքարյանի գործով դատաքննությունն ավարտվել է և դատարանն անցել է դատական վիճաբանությունների փուլին: Նախորդ նիստի ժամանակ Իշխան Բարսեղյանի շահերի պաշտպան Վարդուհի Էլբակյանը դատարանին հայտնեց, որ իրենք ունեն ևս մի քանի միջնորդություններ, սակայն նպատակահարմար չեն գտնում դրանք ներկայացնելու, քանի որ միևնույն է դրանք մերժվելու են:
Հաջորդ դատական նիստը նշանակվեց մայիսի 17-ին, որի ժամանակ մեղադրող դատախազ Կարեն Բիշարյանը հանդես կգա մեղադրական ճառով:
Հիշեցնենք, որ Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանին մեղադրանք է առաջադրվել ՀՀ Քրեական օրենսգրքի 311-րդ հոդվածի 4-րդ մասի 3-րդ կետով՝ դատավորի կողմից կաշառք ստանալը: Կաշառքի միջնորդություն կատարելու համար փաստաբան Էլզա Զաքարյանին էլ մեղադրանք է առաջադրվել ՀՀ Քրեական օրենսգրքի 313-րդ հոդվածի 1-ին մասով՝ կաշառքի միջնորդությունը:
