ՀՀ քննչական կոմիտեի Վայոց Ձորի մարզային քննչական վարչությունում քննվող քրեական գործով ձեռնարկվում են անհրաժեշտ քննչական և օպերատիվ-որոնողական միջոցառումներ՝ պարզելու Եղեգնաձորում գործող հյուրանոցներից մեկում 2018 թվականի հունվարի 1-ին տեղի ունեցած խուլիգանության բոլոր հանգամանքները, անհատականացվում միջադեպին մասնակից անձանց գործողությունները։
Նախնական տվյալներով՝ 2018թ. հունվարի 1-ին Եղեգնաձոր քաղաքի հյուրանոցային համալիրներից մեկում տեղի է ունեցել խուլիգանություն՝ բռնության գործադրմամբ, գույքի ոչնչացմամբ։
Դեպքի առթիվ ՀՀ ՔԿ Վայոց ձորի մարզային քննչական վարչությունում նույն օրը հարուցվել է քրեական գործ և ձեռնարկվել անհետաձգելի քննչական և օպերատիվ-որոնողական միջոցառումներ` դեպքի հանգամանքները պարզելու ուղղությամբ: Արդյունքում՝ պարզվել են դեպքի շարժառիթը, ենթադրյալ հանցագործություն կատարած անձանց ինքնությունները:
Մասնավորապես՝ նախնական քննությամբ փաստական տվյալներ են ձեռք բերվել առ այն, որ դեպքի օրը երկու քաղաքացի մուտք են գործել Եղեգնաձոր քաղաքի հյուրանոցային համալիրներից մեկը և վիճաբանել մի հաճախորդի հետ, ով հյուրանոցում հանգստանում էր ընտանիքի հետ, հայհոյել, բռնություն գործադրել վերջինիս նկատմամբ: Վիճաբանությանը միջամտել է քաղաքացու որդին և քաշքշուկը տեղափոխվել հյուրանոցի սրահից դուրս, որտեղ քաղաքացիներից մեկը ցանկացել է դանակով հարվածել տղամարդուն:
Խուլիգանական գործողությունները դադարեցվել են միայն հյուրանոցի սեփականատիրոջ միջամտության արդյունքում, ինչից հետո նշված ընտանիքի անդամները, անվտանգության նկատառումներից ելնելով, հեռացել են հյուրանոցից։ Իսկ ենթադրյալ հանցագործություն կատարած անձինք որոշ ժամանակ անց վերադարձել այլ անձանց հետ՝ զինված մետաղապլաստե խողովակներով:Ձեռք բերված տվյալների համաձայն՝ վերջիններս, հյուրանոցում չգտնելով հյուրանոցի սեփականատիրոջը, հյուրանոցում հանգստացող տղամարդուն և վերջինիս որդուն, բռնություն են գործադրել հյուրանոցի ընդունարանի աշխատակցուհու նկատմամբ, վնասել հյուրանոցային համալիրի գույքը, բակում կայանված ավտոմեքենան, հյուրանոցային համարներից մեկից հափշտակել հաճախորդին պատկանող որսորդական ողորկափող հրացանը:
Քրեական գործով ձեռնարկված միջոցառումների արդյունքում նույն օրը՝ հունվարի 1-ին, ձերբակալվել են միջադեպին մասնակից անձանցից 2-ը, որոնց հունվարի 3-ին մեղադրանք է առաջադրվել ՀՀ քրեական օրենսգրքի տարբեր հոդվածներով։
Այսպես՝ նրանցից մեկին մեղադրանք է առաջադրվել՝ ՀՀ քրեական օրենսգրքի 147-րդ հոդվածի 2-րդ մասով, 238-րդ հոդվածի 1-ին մասով և 258-րդ հոդվածի 4-րդ մասով, մյուսին՝ ՀՀ քրեական օրենսգրքի 147-րդ հոդվածի 2-րդ մասով և 258-րդ հոդվածի 4-րդ մասով: Նրանց նկատմամբ որպես խափանման միջոց է ընտրվել կալանավորումը:
Քննությամբ փաստական տվյալներ են ձեռք բերվել նաև միջադեպին մասնակից երրորդ անձի ինքնության վերաբերյալ, ում հայտնաբերելու ուղղությամբ իրականացվել են անհրաժեշտ միջոցառումներ։ Հունվարի 9-ին կայացվել է վերջինիս ձերբակալելու որոշում, որի կատարումը հանձնարարվել է ոստիկանության Վայոց Ձորի մարզային վարչությանը։ Հունվարի 10-ին նա ներկայացել է քննչական վարչություն և ձերբակալվել։ Վերջինիս կողմից դատարանում բողոքարկվել է ձերբակալելու մասին արձանագրությունը, ինչը դատարանի կողմից բավարարվել է, և նա ազատ է արձակվել:
Վարույթն իրականացնող մարմինը քրեական գործով ձեռք բերված բավարար ապացույցների համակցությամբ երրորդ անձին մեղադրանք է առաջադրել՝ ՀՀ քրեական օրենսգրքի 258-րդ հոդվածի 4-րդ մասով և միջնորդություն ներկայացրել Արարատի և Վայոց ձորի մարզերի ընդհանուր իրավասության դատարան՝ կալանավորումը որպես խափանման միջոց ընտրելու մասին:
Նախաքննությունը շարունակվում է, միջոցներ են ձեռնարկվում խուլիգանությանը առնչություն ունեցած անձանց շրջանակը պարզելու և դեպքի հանգամանքների օբյեկտիվ, լրիվ և բազմակողմանի քննությունն ապահովելու ուղղությամբ:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
