ELL PARTNERSHIP LLC

Բան Կի Մուն,ՄԱԿ-ի Անվտանգության խորհուրդ,Ռուսաատան վետո,Սիրիական կոնֆլիկտ,Վիտալի Չուրկին

Ռուսաստանը և Չինաստանը վետո են դրել ՄԱԿ-ի ԱԽ-ում Սիրիայի իրավիճակին առնչվող բանաձևի վրա

Մայիսի 22-ին ՄԱԿ-ի Անվտանգության խորհրդում Ռուսաստանը և Չինաստանը վետո են կիրառել Ֆրանսիայի և Լիտվայի առաջարկած այն նախագծի դեմ, որով նախատեսվում էր Սիրիայում պատերազմական պայմաններում մարդու իրավունքների դեմ հանցանքների մասին թղթապանակը` այսպես կոչված «սիրիական գործը», հանձնել Միջազգային քրեական դատարանի (ՄՔԴ) քննությանը: ԱԽ-ի մնացած 13 անդամները կողմ են քվեարկել բանաձևի ընդունման օգտին:

Բանաձևի նախագծով դատապարտվում են «սիրիական իշխանությունների և կառավարամետ կազմավորումների կողմից մարդու իրավունքների և միջազգային հումանիտար իրավունքի լայնածավալ խախտումները, ինչպես նաև ոչ պետական զինված խմբավորումների կողմից մարդու իրավունքների և միջազգային հումանիտար իրավունքի դեմ ոտնձգությունները», որոնք կատարվել են Սիրիայում զինված կոնֆլիկտի ժամանակ` սկսած 2011թ. մարտից և որոնց զոհ է գնացել ավելի քան 100 հազար մարդ:

Ըստ բանաձևի նախագծի` այդ իրավիճակի քննությունը պետք է փոխանցվեր ՄՔԴ-ին: Նախագծում նաև առկա է այն դրույթը, ըստ որի այն արտասահմանյան պետությունների, որոնք ՄՔԴ-ի Հռոմի ստատուտի մասնակիցներ չեն, քաղաքացիների (Սիրիական կոնֆլիկտի մասնակից) վրա տարածվում է «այդ պետությունների բացառիկ իրավազորությունը»:

ՄԱԿ-ի Գլխավոր քարտուղար Բան Կի Մունը ափսոսանք է հայտնել, որ նման կարևոր հարցի շուրջ Անվտանգության խորհրդի անդամները չեն կարողացել միասնական դիրքորոշում որդեգրել: «Սիրիայի ժողովուրդը արդարության հիմնարար իրավունք ունի: ՄԱԿ-ը և նրա անդամ երկրներն ունեն այդ իրավունքը պաշտպանելու հիմնարար պարտականություն»,-Գլխավոր քարտուղարի անունից հայտարարել է նրա տեղակալ Յան Էլիասոնը: Վերջինս ավելացրել է նաև, որ եթե Անվտանգության խորհրդի անդամները այդպես էլ չկարողանան համատեղ միջոցներ գտնել շարունակվող հանցագործությունների մեղավորներին պատասխանատվության ենթարկելու համար, ապա կտուժի Խորհրդի և ողջ ՄԱԿ-ի հեղինակությունը:

Մեկնաբանելով ՌԴ-ի դիրքորոշումը բանաձևի վերաբերյալ` ՄԱԿ-ում Ռուսաստանի մշտական ներկայացուցիչ Վիտալի Չուրկինը մեղադրել է բանաձևին կողմ քվեարկած արևմտյան երկրներին «սիրիական կոնֆլիկտին ռազմական միջամտության առիթ ստեղծելու» և «ԱԽ-ի «հնգյակի» (վետոյի կիրառման իրավունք ունեցող մշտական անդամները) միասնականությանը վնաս հասցնելու» մեջ:

Կարդալ ավելին... Մեկնաբանություններ չկան

ՄԱԿ-ի Գլխավոր ասամբլեա,ՄԱԿ-ի Գլխավոր վեհաժողով

ՄԱԿ-ի Գլխավոր վեհաժողովն ընդունեց Ուկրաինայի տարածքային ամբողջականությունը պաշտպանող բանաձև

2014թ. մարտի 27-ին ՄԱԿ-ի Գլխավոր վեհաժողովը ձայների մեծամասնությամբ ընդունեց Ուկրաինայի տարածքային ամբողջականությունը պաշտպանող և Ղրիմում մարտի 16-ին անցկացված հանրաքվեն անօրինական ճանաչող բանաձև: Բանաձևի նախագիծը ներկայացրել էին Ուկրաինան, Գերմանիան, Լեհաստանը, Լիտվան, Կանադան և Կոստա Ռիկան: Բանաձևի ընդունմանը կողմ են քվեարկել 100 երկիր, դեմ` 11-ը, այդ թվում` Ռուսաստանը, Բելառուսը, Հայաստանը, ևս 58 երկիր, որոնց թվում` Չինաստանը, Հնդկաստանը, Բրազիլիան և Հարավաֆրիկյան Հանրապետությունը, ձեռնպահ են մնացել, մի շարք երկրներ էլ չեն մասնակցել քվեարկությանը:

«Ուկրաինայի տարածքային ամբողջականությունը» վերնագրով բանաձևում, նշելով, որ Ղրիմի Ինքնավար Հանրապետությունում և Սևաստոպոլ քաղաքում 2014թ. մարտի 16-ին անցկացված հանրաքվեն արտոնված չէր Ուկրաինայի կողմից, ընդգծվում է, որ այն, «օրինական ուժ չունենալով, չի կարող հիմք հանդիսանալ Ղրիմի Ինքնավար Հանրապետության և Սևաստոպոլ քաղաքի կարգավիճակի որևէ փոփոխության համար»:

Բանաձևում Գլխավոր վեհաժողովը, հղում կատարելով ՄԱԿ-ի Կանոնադրության 2-րդ հոդվածում ամրագրված` բոլոր պետությունների կողմից ցանկացած այլ պետության տարածքային ամբողջականության դեմ ուժի կամ դրա սպառնալիքի կիրառումից զերծ մնալու պարտավորություններին, Միջազգային իրավունքի սկզբունքների մասին հռչակագրի (1970թ.) համանման դրույթներին, ինչպես նաև Ուկրաինայի անվտանգության երաշխիքների մասին բուդապեշտյան հուշագրին (1994թ.) և մի շարք այլ միջազգային իրավական փաստաթղթերի, մասնավորապես «հաստատում է իր հավատարմությունը Ուկրաինայի ինքնիշխանությանը, քաղաքական անկախությանը, միասնությանը և տարածքային ամբողջականությանը նրա` միջազգայնորեն ճանաչված սահմաններում»:

Բանաձևում կոչ է արվում բոլոր պետություններին «հրաժարվել և զերծ մնալ Ուկրաինայի ազգային միասնության և տարածքային ամբողջականության մասնակի կամ ամբողջական խախտմանն ուղղված գործողություններից, այդ թվում` ուժի սպառնալիքի կամ դրա կիրառման կամ այլ անօրինական միջոցներով Ուկրաինայի սահմանները փոփոխելու ցանկացած փորձից»: Նաև կոչ է արվում բոլոր պետություններին, միջազգային կազմակերպություններին և մասնագիտացված գործակալություններին չճանաչել վերոհիշյալ հանրաքվեի հիման վրա Ղրիմի Ինքնավար Հանրապետության և Սևաստոպոլ քաղաքի կարգավիճակի որևէ փոփոխություն և խուսափել ցանկացած գործողությունից կամ քայլից, որոնք կարող են մեկնաբանվել որպես կարգավիճակի ցանկացած նման փոփոխության ճանաչում:

Գլխավոր վեհաժողովը բանաձևում նաև հորդորում է բոլոր կողմերին «անհապաղ հետամուտ լինել Ուկրաինային վերաբերող իրավիճակի խաղաղ կարգավորմանը` ուղիղ քաղաքական երկխոսության միջոցով, ցուցաբերել զսպվածություն, չդիմել միակողմանի քայլերի և ռազմական հռետորաբանության, որոնք կարող են մեծացնել լարվածությունը, և ամբողջովին մասնակցել միջազգային միջնորդական ջանքերին»:

Նշենք նաև, որ ի տարբերություն ՄԱԿ-ի Անվտանգության խորհրդի ընդունած որոշումների՝ Գլխավոր վեհաժողովում ընդունված որոշումների նկատմամբ հնարավոր չէ վետո կիրառել: ՄԱԿ-ի Գլխավոր վեհաժողովի որոշումները պարտադիր իրավական ուժ չունեն, բայց արտահայտում են միջազգային հանրության կարծիքը:

Աղբյուրը` http://www.un.org/apps/news/story.asp?NewsID=47443#.UzcETKh_uSo

Կարդալ ավելին... Մեկնաբանություններ չկան

Բան Կի Մուն,ՄԱԿ-ի Գլխավոր քարտուղար

ՄԱԿ-ի Գլխավոր քարտուղարի ուղերձը Ստրկության և անդրատլանտյան ստրկավաճառության զոհերի հիշատակման միջազգային օրվա (մարտի 25) առթիվ

Մարտի 25-ը Ստրկության և անդրատլանտյան ստրկավաճառության զոհերի հիշատակման միջազգային օրն է: Շուրջ 400 տարվա ընթացքում` սկսած 16-րդ դարի սկզբից, ավելի քան 15 միլիոն մարդ անդրատլանտյան ստրկավաճառության զոհ դարձավ. այն մարդկության պատմության ամենամռայլ էջերից մեկն է: Միջազգային օրվա առթիվ ուղերձով հանդես է եկել ՄԱԿ-ի Գլխավոր քարտուղար Բան Կի Մունը.

«Յուրաքանչյուր տարի այս օրը մենք հարգանքի տուրք ենք մատուցում միլիոնավոր այն տղամարդկանց, կանանց և երեխաների հիշատակին, ովքեր անցել են ստրկության տանջանքների միջով: Վերհիշելով անդրատլանտյան ստրկավաճառության պատճառները, հետևանքները և դրանից քաղած դասերը` մենք վերահաստատում ենք ներկա և ապագա սերունդներին ռասիզմի և նախապաշարմուքների վտանգների մասին իրազեկելու մեր հանձնառությունը:

Այս տարվա հիշատակի օրվա թեման է՝ «Հաղթանակ ստրկության դեմ Հայիթիում և նրա սահմաններից անդին»: Այն հարգանքի տուրք է աշխարհի ժողովուրդների պայքարին ընդդեմ ստրկության և նշում է 210 տարին, ինչ Հայիթին դարձավ ստրկացված տղամարդկանց և կանանց պայքարի շնորհիվ անկախություն ձեռք բերած առաջին երկիրը: Մենք նշում ենք նաև ՄԱԿԳՄԿ-ի (UNESCO) «Slave Route» («Ստրկության ուղի») ծրագրի 20-ամյակը, ծրագիր, որի մեկնարկման նպատակը ստրկավաճառությունը և դրա հետևանքները քողարկող լռության խզումն էր:

Միավորված ազգերի կազմակերպության կենտրոնական գրասենյակում ընթացքի մեջ են ստրկության և անդրատլանտյան ստրկավաճառության զոհերի հիշատակին նվիրված մշտական հուշակոթողի կառուցման աշխատանքները: Այն կհառնի որպես հարատև հիշեցում այն ստրուկների, ստրկության վերացման կողմնակիցների և չգովերգված հերոսների քաջության, ովքեր օգնել են վերջ դնել ստրկության բռնիշխանությանը: Այն կնպաստի, որ ավելի լավ գիտակցվեն ստրուկների և նրանց հետնորդների ներդրումներն իրենց հասարակություններում:

Հուսով եմ՝ այս հուշահամալիրը նաև ոգեշնչման աղբյուր կլինի մեր օրերում դեռևս գոյություն ունեցող ստրկության բազմաթիվ ձևերի դեմ շարունակական պայքար մղելու համար: Ամբողջ աշխարհում միլիոնավոր մարդիկ դառնում են մարդկանց թրաֆիքինգի, պարտքի դիմաց ստրկության, սեռական ստրկության և տնային (կենցաղային) ստրկության զոհ, մինչդեռ մարդու իրավունքների այս խախտումների հեղինակները գործում են անպատժելիության պայմաններում: Այս օրը եկեք հիշենք անցյալի չարաշահումները և կենտրոնացնենք մեր ջանքերը՝ հանուն ներկայիս չարաշահումների վերացման»:

Աղբյուրը` http://www.un.am/am/News/1381#sthash.TsjwcTTG.dpuf

Կարդալ ավելին... Մեկնաբանություններ չկան

ԶԼՄ-ներն LEGALinfo.am-ի նյութերը մեջբերելիս պարտադիր պետք է պահպանեն «Հեղինակային իրավունքի և հարակից իրավունքների մասին» ՀՀ օրենքի դրույթները:
Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ:
© 2012-2017 LEGALinfo.am Բոլոր իրավունքները պաշտպանված են: